LÊS MAR FOAR!
Fan 1 o/m 26 sept. 2025 binne it wer de Lês-mar-foar-wiken!
Yn dy perioade wurdt oeral yn Fryslân foarlêzen: thús, op de berne-opfang, by gastâlden en op skoallen. Want wat is der no fijner as foarlêzen? En it is ek nochris in prachtige manier om it Frysk te stimulearjen. It tema fan dit jier is 'aventoer'. In werkenber tema foar eltsenien dy't mei jonge bern te krijen hat!
Foar de pjutte-opfang
It Tomke-boekje
Foar pjutten (2-4 jier) ferskynt alle jierren in nij Tomke-boekje, fol mei ferhaaltsjes, ferskes en gedichtsjes. It tema fan 2025 is 'aventoer'. Der is ek in Stellingwerfske, in Bildtske en in Franeker ferzje fan it Tomke-boekje. Sjoch foar mear ynformaasje oer Tomke op tomke.frl.
Alle pjutte- en berne-opfanglokaasjes yn Fryslân (én gastâlden dy’t har opjûn ha), krije nije Tomke-boekjes besoarge yn de wike foarôfgeand oan de Lês-mar-foar-wiken. Sy kinne dêrút foarlêze (litte) en de boekjes dêrnei oan de pjutten mei nei hûs jaan.
Hoe kinne wy meidwaan?
De adressen op de ferspriedingslist krije de boekjes yn de wike fan 25 augustus fergees besoarge. Wizigingen graach trochjaan fia ynfo@tomke.frl. Meidwaan as nije lokaasje of gastâlder? Stjoer in mailtsje mei namme, adres en it tal bern op dyn opfang (minimum fan 8 bern op 'e opfang).
Tagelyk mei de boekjes krije jim ek in poster om op te hingjen yn de Lês-mar-foar-wiken en in lesbrief mei foarlêstips foar de foarlêzer. Lit âlders witte dat jimme meidogge oan de Lês-mar-foar-wiken! Diel ûndersteande flyer fia it ouderportaal, de mail of WhatsApp.
Foar SKOALLEn
It Keimpe-boekje
Keimpe de Krokodil hâldt fan Frysk lêzen! Mei de Lês-mar-foar-wiken ferskynt in nij boekje fan Keimpe foar bern fan 4-8 jier, mei ferhaaltsjes en spultsjes, yn it tema 'fol aventoer'. Alle basisskoallen fan Fryslân krije it Keimpe-boekje en in byhearrende lêsbrief tastjoerd, dêr't sy mei de Lês-mar-foar-wiken út foarlêze kinne.
Skoallen dy't har hjirfoar oanmelden ha, krije boekjes foar alle learlingen en in poster om op te hingjen. Lit âlders ek witte dat jimme meidogge oan de Lês-mar-foar-wiken! Diel ûndersteande flyer fia it ouderportaal, de mail of WhatsApp.
Winaksje!
Kenne jim de Keimpe-rap al? Besjoch, lústerje en sjong mei en miskien winne jim wol in optreden fan Sytse en Melissa op jim skoalle! Hâld dizze webside yn 'e gaten yn de Lês-mar-foar-wiken foar mear ynfo oer de winaksje.
Nij: de Foarlêstas fan Keimpe!
De Foarlêstas kin brûkt wurde om yn ’e klasse oan ’e slach te gean mei Fryske boeken en boekpromoasje. Mei de tas kin Keimpe de Krokodil by de bern útfanhûs. Yn it BoekeDeiBoek kinst opskriuwe wat Keimpe allegear dien hat doe’t er útfanhûs wie, dat yn ’e klasse wer oanlieding wêze kin ta in petearke. Yn de Foarlêstas sit ek noch de Keimpe-hânpop, it sykboek ‘Wêr is Keimpe?’ en it Keimpe-boekje mei lesbrief fan de Lês-mar-foar-wiken. Miskien dogge jim der noch wol mear yn. In ekstra boek? In toskeboarstel, in pyama?
De tas kostet €35 en is te bestellen fia websjop.afuk.frl
Foar THÚS
Lês mar foar!
Foarlêzen, dêr begjint it mei! Tegearre in boekje lêze fersterket de bân mei dyn bern. En bern dêr’t as lytse poppe al oan foarlêzen wurdt, binne letter better yn taal. Asto wolst dat dyn bern yn it Frysk opgroeit, is foarlêzen is in prachtige manier om it Frysk te stimulearjen. Lês hjir mear oer meartalich opgroeien.
Op telefyzje
Op tsjil.omropfryslan.nl binne allegear leuke filmkes te besjen foar bern. Sa binne der 4 printeboekfilmkes, filmkes fan Hinke de Ko en de nije searje 'Wat in aventoer!'. Op Tjitsfloch binne alle ferhaaltsjes en ferskes út de Tomke-boekjes te hearren!
Foarlêstafette!
Berneboeke-ambassadeur Tialda Hoogeveen en wethâlder Tjibbe Brinkman fan de gemeente Achtkarspelen sille op 1 septimber foarlêze út de nije temaboekjes. Nei it foarlêzen wurde de foarlêsboekjes yn de spesjale foarlêstas trochjûn oan de folgjende persoan. Sa reizgje de boekjes alle dagen nei in oare lokaasje en wurdt troch hiel Fryslân foarlêzen! En wy sille se folgje fansels – wêr soene se oeral komme en wêr einigje se? Hâld it yn ‘e gaten op ús socials!
Yn de biblioteek
Mei de Lês-mar-foar-wiken is it ek wer feest yn de biblioteek! Dit jier binne der foarstellingen foar pjutten fan Willy van Assen (Danswil), Poppentheater Rozemarijn en fan Willy van der Meer. Pyke Kroes & Carel van Leeuwen sille harren foarstelling oer it populêre boek 'Lampke' wer opfiere foar de ûnderbou fan it primêr ûnderwiis. It sil grif wer in sukses wurde!
boeketips
Moaie boeketips foar pjutten yn it tema ‘aventoer’:
 | Rinus - yn it Frysk |
| By beppe útfanhûs |
| Kom út dy kraan!! |
| It Grutte Pake&Beppe Foarlêsboek |
| Mol wol de moanne ha |
| Skelte wol in skelter |
| Wêr is myn skaad? |
Moaie boeketips foar bern fan 4 o/m 8 jier yn it tema ‘aventoer’:
|
|
Moaie boeketips foar bern fan 4 o/m 8 jier yn it tema ‘thús’:
De boeken binne te bestellen fia de Afûk websjop én fergees te lienen yn de biblioteek!
Elke lêste freed fan de moanne is it FoarlêsFreed! Hâld de socials fan heit&mem yn 'e gaten.
Sjoch op de webside fan heit&mem foar mear ynformaasje oer meartalich opfieden.
